நேசம்...

தயவு செய்து
திருப்பி கொடுத்து விடாதே..
என்னை நீ...
அண்மையில் தான்
மகிழ்வோடு தொலைந்தேன்..
உன்னில் நான்.

கொஞ்ச நாள்
நெஞ்சில் நிறுத்திப் பார்..
நேசம் புரியும்.
......செந்தமிழினியன்

ஆன்மீக நரகம்

ஆன்மீக பூமியிலே
நாளுக்கு ஓர் உயிர்க்கொலை
அமைதியான நகரத்தில்
அடைப்பு நாட்கள் ஏராளம்!

கொலைகள் இங்கே
மலிவாக நடக்கிறது!
கால் அரை பாட்டில்களுக்கும்
காசுகளின் தேவைக்கும்!

விலங்குகள் வேட்டையாடுவது
உணவுக்கு மட்டுமே
மாந்தனின் வேட்டைக்கு
1008 காரணங்கள்...

சிந்திக்க நேரமின்றி
சிதறடிக்கப்படும் மூளைகள்!
நற்பயிராகாமல் இங்கே
நச்சுக் களைகளாகின்றன!

கை கட்டும் அதிகாரிகள்
காவலுக்கு அரசியல்வாதிகள்
காடையர்களின் துணிகரம்
கனமழையாய் இன்னும்.....

பசி

உலகில் பிறந்த
ஒவ்வொரு உயிருக்கும்
முதல் நோய் பசி

வளர்கின்ற பொழுதில்
கட்டாயத் தேவை
அன்புப் பசி

வளர்ந்த பின்
உலகை அறிய
அறிவுப் பசி

ஆளான பருவத்தில்
அரும்பி மலர்ந்திடும்
உடல் பசி

வாழ்வை வளமோடு
வாழ்ந்திட தேடிடும்
பொருள் பசி

உறவுகளின் துணையோடு
வாழ்கின்ற காலத்தில் வரும்
கடமைப் பசி

ஊருக்கு உழைக்கின்ற
அரிதான சிலரிடம்
காண்பது ஈகைப் பசி

அகவை முதிர்ந்து
ஏங்கும் மனதினில்
வந்திடும் தனிமைப் பசி

எல்லோர்க்கும் ஒரு நாள்
இறுதியாக வரும்
மரணப் பசி.

சேறுபடாதவன் கால்களில்
செருப்பு
கல்லெடுத்து வைக்காதவன்
கருவறைக்குள்
உழைப்பே இல்லாதவன்...
நிலக்கிழார்
சமதர்மம் ஓடுகிறது
சாக்கடையாய்...
- செந்தமிழினியன்

இஸ்லாமியர் வீட்டில்
பிள்ளையார் சிலை
தெரு முட்டு
- செந்தமிழினியன்